الجانب الآخر ولوم الضحية ونجاح الثورة

الجمعة 16 مارس 2012 - 23 ربيع الثاني 1433

كتير بحس إن طريقي بيتغير لحكمة معينة وده حصل انهاردة ف طريقي لـ "هنجيب حق سميرة إبراهيم"عشان أشوف عدم الاهتمام بالأهم والأولى + ضرورة إنك تسمع الآخر الذي ليس ضدك واللي ضدك + كيف أن البعض فعلاً يلوم الضحية

البداية كانت ف مواصلة الميكروباص اللي اتغيرت ولقيت نفسي قاعد على يميني واحد رايح يحضر مؤتمر الإخوان لنصرة فلسطين وسوريا وعلى شمالي جاري القديم ... دردشت معاهم - بصفتي مؤيدًا لأبوالفتوح - عن إن قرار شورى الجماعة لازم يكون لدعم أبوالفتوح:"هيلاقو أحسن منه فين! راجل من كوادر الجماعة ومرشح قوي وكويس فعلاً." >>> كان رد جاري: "طب دي اسمها ديمقراطية! انتا هتأيد أبوالفتوح وأنا مثلاً مش هأيده." واللي على يميني قال:"شورى الجماعة لما تاخد قرار يبقه لازم أنا ألتزم بيه وإلا بكون بنشق عن الجماعة. ألتزم عشان النفع العام."

على رصيف مترو اتجاه حلوان غيرت العربية اللي كنت راكبها >>> ف ايدي الشعار اللي كتبته "أنا مع كل سميرة إبراهيم ,,, ضد أي خسيس لئيم" "حق سميرة ... حق كل مصر">أي حد بيتناقش معايا بتعرف عليه بشكل ودود عشان الموضوع يكون ودود ... ربنا يديم الود :)
حسين ورزق تجار قطع غيار ف شارع رمسيس. اليافطة اللي معايا خلتهم يكلموني. حسين: "رايح التحرير؟!" أنا: "إزاي يعني!! رايح جمال عبدالناصر :)" حسين: "الفتنة نائمة لعن الله من أيقظها!" الباب فتح وحسين هيسبني ويمشي: "استنى بس يعم حسين نكمل كلامنا! ... ايه علاقة (الفتنة) باليافطة؟!" رزق: "اللي عايز يبني البلد دي لازم يشتغل بجد إحنا المفروض نهدى ونبني البلد...أنا مقعد العمال عندي جمب بعض ومقدرش أقطع عيشهم. مظاهراتكم بتأذينا. أول أسبوع الجنزوري مسك فيه، شفنا عز مشفنهوش إلا قليل ... ده أنا اشتريت مكنة جديدة اليومين دول؛ مكنة شغل مش موتوسكل ... انتا شغال؟!" ده اللي قاله "رزق" فعلاً. (سامع واحد بيقرا دلوقتي وبيقول: "طب ما هو أول أسبوع لحكومة الجنزوري كان التحرير مقفول!) 
أنا: "شغال مترجم. أنا عن نفسي حاسس بيكم وبأيد إن المظاهرات تهدى فعلاً فترة طويلة نسبيًا وعشان كده آخر حاجة شاركت فيها كانت 25 يناير 2012 ... انتا لما بتقولي إن المظاهرات بتأذيك ف أكل عيشك، مش هقدر أرد عليك ولولا الوقت،  كنت اتناقشت معاك كتير ف إن المظاهرات ملهاش علاقة بأكل عيشك (قالي موضوع أول أسبوع للجنزوري كمان مرة) فقلت له: "على أي حال أنا لسة كنت هقلك مش هجادل معاك كتير ف نقطة أذية أكل عيشك وهقولك ماشي>انتا صح> المظلوم يعمل ايه عشان ياخد حقه ... سميرة مثلاً واللي معاها يعملوا ايه! قالوا الأول كشوف العذرية محصلتش وبعدين الطبيب الظابط خد براءة>طب مين اللي عمل كشوف العذرية؟! فيه حاجة اسمها هاتلي المتظاهرات أما أشوفهم عذارى ولا لأ! > اللي بيكلمك ده بشكل شخصي مبيحبش يشارك ف كل المظاهرات عشان أراعي الناس اللي ضدها أو مأذية منها>بس قولي، انتا كواحد مأذي ف أكل عيشه، شايف المظلوم يعمل ايه عشان يترد اعتباره؟!" حسين: "إذا كان القضاء اداله براءة ففيه قضاء لا بيغفل ولا بينام (وبيشاور بإيده للسما)" حسين قالي:"انتا راجل كويس ... بتاخد وتدي معايا ف الكلام."
لازم فعلاً نسمع "الكنبة" أكتر ما نكلمهم. رزق وحسين قالولي من بين كل اللي قالوه: "الثورة دي بقت ثورة لأن الشعب كله ساند الشباب ... لما تفضلو تعطلونا كده، مش هتلاقو حد يساندكم ... أنا أول واحد هيشارك ف المظاهرات لو انتخابات الرئاسة محصلتش بعد 3 شهور".

الموضوع كبير بين من يسعى لكسب عيشه ومن يتم ظلمه وضياع حقه ... والحل الممكن؛ يا كل ثوري عايز الثورة تنجح، اسمع الناس أكتر ما تكلمهم. تويت شارع من أبرز المبادرات اللي بتتكلم ف الموضوع ده.

حضرت الوقفة. فرحت بسلامي على سميرة: "أوعدك إني أعيش عشان أجيبلك حقك وحق مصر." سميرة: "احنا ضعاف!"
هتافات "ارفعي راسك ارفعي راسك> انتي أشرف م اللي داسك" "يسقط يسقط حكم العسكر" "حركة طلابية واحدة > ضد الظلم اللي بيدبحنا"

5:20 - رصيف مترو شبرا

حصل تاني إني أركب عربية غير اللي كنت ناوي أركبها. ف العربية دي اتكلم معايا   - بسبب اليافطة اللي أنا ماسكها - راجل هندامه جيد قالي إنه بيحضر دكتوراه وعلى شمالي شاب من الشباب اللي تشوفهم تقول إنه مش متعلم - لسة مخلص جيشه حسب كلامه - وعلى يميني شاب تشوفه، تقول واد بتاع روشنة.

خلاصة كلام الدكتور: "انتو كده هتوقعو البلد ... على افتراض إنها مظلومة فعلاً، مخلاص القضاء حكم! هتستفيدوا ايه من المظاهرات!" ... مدنيش فرصة وكان بيكلمني وبس وقالي أنا نازل المحطة دي ... كنت عايز أقوله إني استفادتي هي التنفيسة اللي قال عليها محمود المليجي ف المشهد الأشهر "وعايزيني أكسبها!"

خلاصة كلام الشاب الروش: "ربنا ينصر الحق"

خلاصة الشاب اللي لسة مخلص جيش: "مستحيل ظابط جيش يعمل كده! التعذيب ضروري أحيانًا!"

الاتنين الشباب دول قلت لهم: "المحكمة الإدارية العليا حكمت في ديسمبر بعدم قانونية كشوف العذرية >>> والموضوع مش موضوع سميرة بالذات لأن كان معاها بنات تانية بس هيا الوحيدة اللي كانت شجاعة وقالت هاخد حقي بالقضاء" >>> ساعتها سمعت دوشة ف العربية. راجل لابس عمة وجلبية ولهجته صعيدي ماسك ف خناق راجل وكمان بيضرب مراته (الصعيدي يضرب زوجته أيضًا). كانت الزوجة ماسكة طفل ف إيدها وشايلة طفل تاني ماسك قرصة بياكلها. عرفت سبب الخناقة إن الصعيدي شاف الراجل التاني بيحط ايده على مراته. مراته قالت محصلش. الراجل المتهم نزل والصعيدي بيضرب مراته>وأنا وواحد ملتحي بنحوشه عن ضرب مراته لحد ما جه شاب جدع مسكه وكتفه وقاله مش سايبك غير قدام الحكومة (حصل فعلاً).

الصعيدي السابق ذكره بيضرب مراته وبيشتمها عشان راجل حط ايده عليها ... مش عشان مراته عملت حاجة غلط >>> لوم الضحية.

اسمعوا الكنبة بدل ما تسخروا منهم. اسمعوا الكنبة أكتر ما تتعاملوا معاهم كأنكم الأساتذة وهما التلاميذ.
انصروا الحق القريب منكم؛ إن كنتم تريدون نصرة الحق البعيد عنكم. انصروا الحق بالأفعال وليس بالمؤتمرات اللي ملهاش أي أثر على أرض الواقع غير إن يتقال عليكم "مؤتمر الفلانيين لنصرة سوريا وفلسطين"

انصروا الحق >>> الثورة مستمرة

Copy Rights @Marcoo72

سميرة في وقفة دار القضاء بمشاركة "الاتحاد النسائي المصري" والحركات الطلابية - تصوير عفاف السيد 

أهمية التنفيسة

V V V V V

V V V V

V V

V

بيان المجلس العسكري 12 يوليو

17 يوليو 2011

ملحوظة: بعض النص لن يظهر بشكل سليم إلا في جوجل كروم والله أعلم ايه السبب!

تحديث (17 يوليو عصرًا): الرسالة 68 ... اللهجة خفت شوية؛ التفاصيل المذكورة في 1 و2 و3 وأ وب وج هي التي أراها تخفيفًا للهجة

خلونا الأول كده نعرض كام صورة من ميدان التحرير

بوستر الفقراء أولاً 

ليلة 10 يوليو

صلاة فجر 12 يوليو

ليلة 13 يوليو؛ سادس يوم اعتصام

(1) نقاط مهمة:

- جاء البيان بعد "جمعة الثورة أولاً 8 يوليو" وبيان عصام شرف الذي عارضه وزير الداخلية منصور العيسوي.

- لم يلقِ اللواء الفنجري البيان من ورق بل ألقاه كأنه يحفظه مما تسبب في عبارة غير منطقية في البيان وهي (وتشكك فيما يتم من إجراءات تثير النزاعات وزعزعة الاستقرار). كأنه يقول نحن نقوم بإجراءات تثير النزاعات وتزعزع الاستقرار ولكن الشائعات تشكك في أننا نقوم بذلك!

- المظلل بالأحمر في نص البيان كان من أبرز نقاط ارتفاع صوت اللواء الفنجري. ارتفاع صوت اللواء الفنجري؛ كان أهم الانتقادات الموجهة للبيان هو النبرة تهديدية.

- أجرت صفحة كلنا خالد سعيد استفتاءً حول البيان (حتى اللحظة 10:25 م أكثر من 18 ألف وجدوا البيان مخيبًا للآمال وأكتر من 12 ألف وجدوه قويًا وفي وقته). ظل الفرق بين الاختيارين بهذه النسبة من بداية الاستفتاء.

(2) وجهة نظري:

1) لا يصح إلقاء بيان على جماهير الشعب بهذه اللهجة العسكرية التي تمثلت في الإشارة بإصبع التهديد وحدة الصوت المبالغ فيها.

2) لماذا الفنجري بالذات؟ الفنجري الذي أحبه الشعب وأصبحت صورته وهو يؤدي التحية العسكرية للشهداء صورة أيقونية؟ وكأنها رسالة ضمنية (هتشوفوا الوش التاني!).

3) (لقد أعلنت القوات المسلحة منذ بداية الثورة انحيازها الكامل للشعب). الشيء بالشيء يُذكر، من البديهي والطبيعي أن تنحاز القوات المسلحة للشعب. الأهم من بداهة وطبيعية هذا الانحياز، ما حدث على أرض الواقع لم يكن "انحياز منذ بداية الثورة" ويشهد على ذلك فُرجة القوات المسلحة على 20 ساعة قتال متواصلة يوم 2 فبراير "موقعة الجمل".

4) توجد أكثر من نقطة مرسلة ينبغي إعلام جماهير الشعب بتفاصيلها؛ (خامسًا وسادسًا بالذات). ولا يجب تحديد هذه التفاصيل إلا عبر حوار مجتمعي شامل يتم إعلام الجماهير بتفاصيله ونتائجه عبر وسائل الإعلام المختلفة. يتم هذا الحوار مع الأحزاب وأهل الذكر والكيانات النشطة والشباب العاديين الذين لا ينتمون إلى حزب أو كيان. ببساطة يتم اختيار هؤلاء الشباب بتلقي طلباتهم بالاشتراك في الحوار وتصفيتها. بالطبع البيانات التليفزيونية ليس هي القناة المناسبة لذكر هذه التفاصيل ولكن المؤتمرات الصحفية الدورية وما شابه هي التي تناسب ذلك.

5) من أمثلة الكلام المرسل في هذا البيان: (وأكدت وقوفها الدائم بجواره لتحقيق مطالبه المشروعة) ... يجب ذكر تفاصيل ما فعله المجلس الأعلى من أجل تحقيق مطالب الشعب كأن يذكر تفاصيل ما فعله لتحقيق العدالة على سبيل المثال (مرة أخرى البيانات لا تصلح لذكر هذه التفاصيل ولكن المؤتمرات الصحفية والنشر عبر مختلف وسائل الإعلام). فالواقع، أن جماهير الشعب لم تلمس تحقيق مطالب بنسبة تجعلها راضية. ويتمثل دليل ذلك في أن المشاركة الجماهيرية في "جمعة الثورة أولاً 8 يوليو" كانت أقوى من "جمعة القصاص 1 يوليو" و"جمعة 27 مايو". ومن الجدير بالذكر أن "جمعة الثورة أولاًُ" لم تكن في ميدان التحرير فقط وأن الميدان لم يشتمل على القاهريين فقط بل اشتمل على الدمايطة والبنهاوية والصعايدة وغيرهم. مثال آخر (بما قرره في خطته لإدارة شئون البلاد) ما هذا الذي قرره؟ وهل من السليم أن ينفرد المجلس بالقرار؟

6) (انحراف البعض بالتظاهرات والاحتجاجات عن النهج السلمي...) هذا إطلاق تهم مرسلة مثلما فعل مبارك عندما خيرنا بين الفوضى والاستقرار. استغلال أنه بيده هو فقط نقطة القوة المؤثرة؛ التليفزيون. هذا استعداء ووقيعة بين وجهات النظر المختلفة. ولقد ثبت أن لا شيء يتم تحريكه للأمام إلا بالتظاهر (مثال: إنشاء صندوق أسر الشهداء واتجاه رئيس الوزراء إلى إجراء تعديل وزاري).

7) (فإنها تدعو المواطنين الشرفاء للوقوف ضد كل المظاهر التي تعيق عودة الحياة الطبيعية لأبناء شعبنا العظيم). ما معنى هذه الدعوة؟ لن أقول (الرأي لكم؟). هذا تصرف لا أخلاقي ودعوة للوقيعة بين أبناء الشعب المختلفين في وجهات النظر.

8) الخلاصة: ما هيك بتم الأمور!

(3) نص البيان:

"لقد أعلنت القوات المسلحة منذ بداية الثورة انحيازها الكامل للشعب وأكدت وقوفها الدائم بجواره لتحقيق مطالبه المشروعة في إطار الشرعية الدستورية والقانونية. ويؤكد المجلس أنهلن يتخلى عن دوره في إدارة شئون البلاد في هذه المرحلة الفارقة من تاريخ مصر على النحوالذي عبرت عنه جماهير الشعب وأكدته نتيجة الاستفتاء كما أنه لن يحيد عن هذا الدور الوطني للقوات المسلحة وقيادته الوطنية وانطلاقًا من هذا الدور فإن القوات المسلحة ممثلة في مجلسها الأعلى تؤكد الآتي:

أولاً: حرية الرأي مكفولة للجميع ولكل مواطن الحق في التعبير عن الرأي في حدود القانون

ثانيًا: التزام المجلس الأعلى للقوات المسلحة بما قرره في خطته لإدارة شئون البلاد خلال الفترة الانتقالية من خلال إجراءات انتخابات مجلسي الشعب والشورى ثم إعداد دستور جديد للبلاد وانتخاب رئيس للجمهورية وتسليم البلاد للسلطة المدنية الشرعية المنتخبة من الشعب

ثالثًا: استمرار دعم السيد رئيس مجلس الوزراء للقيام بكافة الصلاحيات المنصوص عليها بالإعلان الدستوري وكافة القوانين الأخرى

رابعًا: إعمال أحكام القانون عند إحالة الجرائم للقضاء المختص

خامسًا: الاستمرار في سياسة الحوار مع كافة الأطياف والقوى السياسية وشباب الثورة لتلبية المطالب المشروعة للشعب

سادسًا: إعداد وثيقة مبادئ حاكمة وضوابط لاختيار الجمعية التأسيسية لإعداد دستور جديد للبلاد وإصدارها في إعلان دستوري بعد اتفاق القوى والأحزاب السياسية عليها

إن المجلس الأعلى للقوات المسلحة إدراكًا منه بجميع المخاطر المحيطة بالوطن والتي تسير وفق منهج يضر بمصالحه العليا منها...

1) انحراف البعض بالتظاهرات والاحتجاجات عن النهج السلمي مما يؤدي إلى الإضرار بمصالح المواطنين وتعطيل مرافق الدولة وينبأ بأضرار جسيمة بمصالح البلاد العليا

2) ترديد الشائعات والأخبار المغلوطة التي تؤدي إلى الفرقة والعُصيان وتخريب الوطنوتشكك فيما يتم من إجراءات تثير النزاعات وزعزعة الاستقرار

3) تغليب المصالح الخاصة المحدودة على المصالح العليا للبلاد

واستشعارًا من القوات المسلحة بالمسئولية التاريخية وانطلاقًا من دورها الوطني، فإنها تدعو المواطنين الشرفاء للوقوف ضد كل المظاهر التي تعيق عودة الحياة الطبيعية لأبناء شعبنا العظيم والتصدي للشائعات المضللة.

إن القوات المسلحة مؤيَدة بثقة الشعب وانطلاقًا من ثوابتها الوطنية تؤكد أنها لن تسمح بالقفز على السلطة أو تجاوز الشرعية لأي من كان وسيتم اتخاذ ما يلزم من إجراءات لمجابهة التهديدات التي تحيط بالوطن وتؤثر على المواطنين والأمن القومي من أي عبث يراد بها وذلك كله في إطار من الشرعية الدستورية والقانونية ... وقى الله مصر شر الفتن وحفظها من كل سوء والسلام عليكم ورحمة الله وبركاته